२०८१ जेष्ठ ८ गते मङ्गलवार

त्रिवेणी गाउँपालिका रोल्पाको ५ नम्बर वडा पहिलो बालश्रम मुक्त वडा घोषणा



अमृत वली
रेडियो पल्लवी रोल्पा


मङ्सिर १५

रोल्पा जिल्ला अन्तर्गत त्रिवेणी गाउँपालिकाको वडा नं. ५ लाई आज एक विशेष समारोहको बिचमा बालश्रम मुक्त वार्ड घोषणा गरिएको छ ।
बालबालिकाहरु, बालक्लबहरु, स्थानीय व्यापारी, उद्योगी, आमा समूह, महिला समूह, वडा बाल अधिकार समिति, शिक्षक, कर्मचारी, राजनीतिक दलका प्रमुख तथा प्रतिनिधिहरु तथा जनप्रतिनिधिहरुको सहभागीमा बाजासहितको र्‍याली ”बालश्रम अन्त्य गरौँ, त्रिवेणी गाउँपालिकालाई बालश्रम मुक्त स्थानीय तह घोषणा अभियान भव्यताका साथ सफल पारौँ” भन्दै बजार परिक्रमा गरी श्री जन जागृति माध्यमिक विद्यालयको प्राङ्गनमा औपचारिक घोषणा समारोहमा परिणत भएको थियो ।

वडा नं. ५ का वडा अध्यक्ष श्री कृष्ण बहादुर के.सी. को अध्यक्षतामा सञ्चालन गरिएको घोषणा समारोहमा गाउँपालिका अध्यक्ष श्री शान्त कुमार वलीको प्रमुख अतिथ्यता, गाउँपालिका उपाध्यक्ष श्री सावित्रा कुमारी बुढा घर्तीको विशिष्ट आतिथ्यता तथा गाउँपालिकाका प्रमुख प्रशासकीय अधिकृत श्री निम बहादुर के.सी. को विशेष आतिथ्यतामा कार्यक्रम भएको थियो । उक्त कार्यक्रममा बोल्ने वक्ताहरुले बालश्रम अन्त्यको लागि सबैले आ-आफ्नो तर्फबाट पहल गर्नुपर्ने धारणा व्यक्त गरेका थिए । उक्त घोषणा समारोहमा विशिष्ट अतिथि गाउँपालिका उपाध्यक्ष श्री सावित्रा कुमारी बुढा घर्तीले गाउँपालिका, सेभ द चिल्ड्रेन र मानव अधिकार सचेतन केन्द्र (हुरेक) लगायत सबै सरोकारवालाहरुको प्रयत्नबाट यो सामाजिक अभियान सफल भएको धारणा व्यक्त गर्दै आगामी दिनमा समेत यस्तै प्रकारका सामाजिक अभियानमा हातेमालो गर्दै गाउँपालिकासँग अगाडी बढ्न आह्वान गर्नु भएको थियो ।साथै प्रमुख अतिथि एवं गाउँपालिका अध्यक्ष श्री शान्त कुमार वलीले गाउँपालिकाबाट बालबालिकाको क्षेत्रमा गरिएको ठूलो लगानी र प्रयत्न तथा स्थानीय सरोकारवाला र जनताको सहयोगबाट आजको बालश्रम मुक्त वडा घोषणाको सफलता प्राप्त भएको धारणा राख्नु भएको थियो ।

विभिन्न विद्यालयका विद्यार्थीहरुले सचेतनामूलक नृत्य, नाटक प्रदर्शन गरेका थिए । उक्त कार्यक्रमको सञ्चालन गाउँपालिकाका प्रशासन अधिकृत श्री हेमराज उपाध्यायले गर्नु भएको थियो । साथै मंसिर २३ गतेसम्म गाउँपालिकाका सबै वडाहरुलाई बालश्रम मुक्त वडा घोषणा गरी पौष मसान्तसम्म बालश्रम मुक्त गाउँपालिका घोषणा गर्ने कार्यक्रम रहेको छ ।

प्रकाशित मिति : २०७८ मङ्सिर १५ गते बुधवार