दैलेखमा शिक्षकको घाँटी रेटेर हत्या संलग्नका प्रहरीले एक युवतीलाई सार्वजनिक गरेको छ। गुराँस गाउँपालिका–८ छोटेपोखरीकी २५ वर्षीया मुना रानाले व्यक्तिगत रिसिबीका कारण घाँटी रेटेर हत्या गरेको स्वीकार गरेकी छन् ।
उनले भदौ २८ गते राति धारिलो वस्तुले घाँटीमा प्रहार गरेर सोही ठाउँका ४२ वर्षीया नगेन्द्र कुमार विसीको हत्या गरेकी हुन् । विसी मालिका माध्यमिक विद्यालयमा सामाजिक विषयका शिक्षक थिए । शिक्षक विसीको सोही विद्यालयको बरण्डामा मंगलबार बिहान ७ बजेतिर शव भेटिएको थियो । बिहान दूध पु–याउन जाँदै गरेका स्थानीयले शिक्षक विसीको शव देखेपछि प्रहरीलाई खबर गरेका थिए ।
त्यसपछि जिल्ला प्रहरी कार्यालयका प्रहरी निरीक्षक इन्द्रजीत सुनारको कमाण्डमा प्रहरी चौकी लालिकाँडाबाट खटिएको टोलीले उक्त घटनाको घटनास्थल, लासजाँच, मुचुल्का, घटनास्थलमा भेटिएका सबुत प्रमाण संलग्न र खानतलासी बरामदी मुचुल्का समेत तयार गरेर अनुसन्धान गरेको थियो ।
जिल्ला प्रहरी कार्यालयका प्रहरी नायब उपरीक्षक अनुपम श्रेष्ठले अनुसन्धानको क्रममा ती महिलाले हत्या गरेको स्वीकार गरेको जानकारी दिए ।
उनले भने,‘ अपराध स्वीकार गरेकै आधारमा पीडित पक्षबाट जाहेरी दरखास्त लिई मुना रानालाई कर्तव्य ज्यान कसुरको अनुसन्धानका लागि जिल्ला अदालतबाट म्याद थप गरेर हिरासतमा राखिएको छ ।’ घटना बारे थप अनुसन्धान पनि भइरहेको श्रेष्ठले बताए ।