२०८१ असार ३ गते आइतवार

जाजरकोट भूकम्पका पीडितलाई अभिनेता पल शाहले ५० हजार रुपैयाँ आर्थिक सहयोग गर्ने



जाजरकोट भूकम्पका पीडितलाई अभिनेता पल शाहले ५० हजार रुपैयाँ आर्थिक सहयोग प्रदान गर्ने घोषणा गरेका छन् । तत्कालका लागि आफूले सामाजिक संस्था टीम नेपालबाट आर्थिक सहयोग प्रदान गरेको पलले सामाजिक संजालमा जनाएका छन् ।
उक्त संस्थाको राहत र स्वास्थ्य टोली जाजरकोट पुग्ने समेत पलले उल्लेख गरेका छन् । धेरै घर भत्केकाले नागरिक खुला आकाशमुनि बस्न र खानपिनको ब्यवस्था नभएको बताउँदै पलले सम्बन्धित निकायलाई आग्रह समेत गरेका छन् ।
यो दुःखद घडीमा सम्पूर्ण नेपाली एक भएर उद्दार र सहयोग गर्न समेत उनले आग्रह गरेका छन् । फिल्म निर्माता तथा निर्देशक आकाश अधिकारीले आफूसँग भएको ५०–७० थान त्रिपाल पीडितलाई सहयोग गर्ने जनाएका छन् ।
अभिनेत्री करिश्मा मानन्धरले पीडितको उद्दार र राहतमा जुट्न सरकारलाई आग्रह गरेकी छन् । चलचित्र विकास बोर्डका तर्फबाट अध्यक्ष भुवन केसीले जनधनको क्षतिप्रति दुःख व्यक्त गर्दै राहत र उद्दारमा जुट्न अपिल गरेका छन् ।
फिल्म, संगीत, नाटक र फेसन जगतका सेलिव्रिटीले सामाजिक संजालमा जाजरकोट भूकम्पप्रति दुःख व्यक्त गर्दै राहत र उद्दारमा जुट्न सरकारलाई आग्रह गरेका छन् । नेपाल प्रहरीका अनुसार जाजरकोटको रामीडाँडा केन्द्रविन्दु भएर गएको भूकम्पमा शनिबार बेलुकासम्म १५७ जनाले ज्यान गुमाएका छन् भने १७० घाइते छन् ।

प्रकाशित मिति : २०८० कार्तिक १८ गते शनिवार